Elkarte bat sortzeko gida

Baliteke kultura-jardueraren bat antolatzen pentsatzen aritzea, zure herriko bizimodua hobetzeko bizilagunak bildu nahi izatea edo kirola gustuko izatea eta lehiaketak antolatzeko edo laguntzak eskatzeko egitura bat eduki nahi izatea. Elkarte bat baliagarria izan dakizuke edozein gauzatarako, eta erraz samarra da martxan jartzea. Jakin behar duzun guztia kontatuko dizugu.

Zer da elkarte bat?

Irabazi-asmorik gabeko erakunde pribatua da, pertsona fisikoez osatuta – boluntarioak izan daitezke –, eta nortasun juridiko osoarekin. Helburua kulturala, kirolekoa, soziala, erlijiosoa edo hezkuntzakoa izan daiteke, eta onura publikoko deklarazioa eska dezake. Elkarteak, estatu mailan, Elkartzeko Eskubidea arautzen duen 1/2002 Lege Organikoak arautzen ditu, eta Euskal Autonomia Erkidegoan, Euskadiko Elkarteei buruzko ekainaren 22ko 7/2007 Legeak.

Nork sortu dezake elkarte bat?

Gutxienez hiru pertsona behar dira, elkarte guztiek gutxienez hiru kargu izan behar baitituzte: Lehendakaritza, diruzaintza eta idazkaritza. Pertsona horiek izan daitezke: adinez nagusiak, emantzipatu diren eta beren kontura bizi diren 16 urtetik beherakoak, edo oraindik emantzipatu ez diren eta gurasoen edo legezko tutoreen baimena duten adin horretatik beherakoak. Nolanahi ere, beren ekintzen erantzule izan behar dute juridikoki.

Zeintzuk dira sortzeko baldintzak?

Elkarteak izango lukeen jarduera-esparrua ezagutzea.
Elkartea sortzeko baldintzak ezagutzea:
- Gutxienez hiru pertsona izatea.
- Beharrezko dokumentazio guztia prestatzea, Euskal Autonomia Erkidegoko Elkarteen Erregistro Orokorraren ereduen arabera beteta: eraketa-akta, eskaera, estatutuak eta zuzendaritza-batzordea.
- Dagozkion erregistroak bilatzea eta haietan inskribatuta egoteak dakartzan baldintzak eta abantailak ezagutzea:
  - Euskal Autonomia Erkidegoko Elkarteen Erregistroa:
    https://www.euskadi.eus/euskal-autonomia-erkidegoko-elkarteen-erregistroa/web01-tramite/eu/
  - Euskal Autonomia Erkidegoko Kirol Erakundeen Erregistroa:
    https://www.euskadi.eus/erregistroa/kirol-erakundeen-erregistroa/web01-tramite/eu/
  - Elkarteen Erregistro Nazionala:
    http://www.interior.gob.es/web/servicios-al-ciudadano/asociaciones

Dokumentazioa

Elkarte bat sortzeko eskaera erakundearen ordezkariak egiten du elektronikoki.

Eraketa-akta

Gutxienez hiru pertsonek adostuta, eraketa-akta erakunde antolatu bat sortzeko borondatea jasotzen duen dokumentua da. Akta horrek elkartearen izena, izen soziala eta bazkide sortzaileen datuak jasotzen ditu.

Elkarteen izenak betekizun hauek bete beharko ditu:

Izendapena bat etorriko da eraketa-aktaren lehenengo xedapenean eta estatutuen lehenengo artikuluan jasotakoarekin.
Izenak “asociación” edo “elkartea” terminoa izango du nahitaez.
Izenak, alde batetik, elkartearen helburuei edo helburu nagusiari erreferentzia egiten dioten hitz bat edo batzuk izan behar ditu, eta, bestetik, izena bereizteko eta beste batzuetatik bereizteko balio duen termino bat (hitz bat edo batzuk edo siglak izan daitezke).

Bazkide izan daitezke pertsona fisikoak eta juridikoak, publikoak edo pribatuak.

14 urtetik gorako adingabe emantzipatu gabeek baimen egiaztatua aurkeztu behar dute.

Estatutuak

Elkartearen oinarrizko arauak dira. Arau juridikoa ez izan arren, lotesleak dira, eta bazkide guztiek beren borondatez egiten diete men elkartera sartzean.

Eraketa-aktarekin batera aurkeztu behar dira, eta Elkartzeko Eskubidea arautzen duen martxoaren 22ko 1/2002 Lege Organikoan eta Euskadiko Elkarteei buruzko ekainaren 22ko 7/2007 Legean ezarritako baldintzak bete behar dituzte.

Zuzendaritza Batzordea

Zuzendaritza Batzordea eratzeko dokumentuak batzordea osatzen dutenen datuak jaso behar ditu.

Euskal Autonomia Erkidegoko Elkarteen Erregistro Orokorrean inskribatzea

Elkartea sortzeko behar diren dokumentuak bete ondoren, elkarte gisa izena eman behar da. 2018ko urriaren 2tik, izapideak elektronikoki baino ez dira egiten.

https://www.euskadi.eus/euskal-autonomia-erkidegoko-elkarteen-erregistroa/web01-tramite/eu/

Elkarte baten eraketa inskribatzeko aurkeztu beharreko dokumentazioa:

Eraketa-akta. Bazkide sortzaileek sinatuta egon behar da.
Estatutuak. Orri guztiak bi aldeetatik, lehendakariak eta idazkariak sinatu behar dituzte.
Zuzendaritza Batzordea osatzen duten pertsona guztien Nortasun Agiri Nazionalaren (NAN) fotokopia.

Gehienez ere hiru hilabeteko epea igaro ondoren, Erregistrotik elkartearen inskripzioa jakinaraziko da.

Une horretan, akta, kontu eta bazkide-liburuak eraman behar dira (inolako oharrik gabe), Eusko Jaurlaritzan zigilatu ditzaten.

Erregistroan inskribatuz gero, elkartearen eraketa eta estatutuak argitaratzen dira.

Identifikazio Fiskaleko Kodearen (IFK) eskaera

Elkartea Euskal Autonomia Erkidegoko Elkarteen Erregistro Orokorrean inskribatu ondoren, Identifikazio Fiskaleko Kodea (IFK) eskatu behar da. Eskaera Arabako Foru Aldundiko Ogasun Sailean egin da (Samaniego kalea 14), 006 inprimaki-ereduaren bidez. Harekin batera, honako hauek ere eman behar dira:

Eusko Jaurlaritzan emandako dokumentazio guztiaren jatorrizkoa eta fotokopia.

Bazkide fundatzaile baten Nortasun Agiri Nazionala (NAN), IFK eskaera sinatzen duena.

Banku-kontu bat irekitzea

IFK lortu ondoren, banku-kontu bat ireki daiteke elkartearentzat. Horretarako, finantza-erakundera jo behar da identifikazio fiskaleko txartelarekin.